Omgewingsopvoeding kweek jong kampioene vir ’n volhoubare Namibië

Verstaan omgewingskwessies beter
Deur die Nedbank Go Green Fund ontvang NaDEET N$150 000 om opvoeders met praktiese omgewingsvaardighede toe te rus en jong Namibiërs se bewustheid van volhoubaarheid, natuurbewaring en klimaatsverandering te bevorder.
Rozanne Swart
  • 13 Hours Ago

Klimaatsverandering en die verlies aan biodiversiteit maak omgewingsopvoeding al hoe belangriker. Die ontwikkeling van veerkragtige gemeenskappe verg nie net doeltreffende beleide en infrastruktuur nie, maar ook jongmense wat die verband tussen menslike welstand en die beskerming van natuurlike hulpbronne verstaan.

Deur die Nedbank Go Green Fund, wat deur die Namibia Nature Foundation (NNF) gefasiliteer word, word ondersteuning aan inisiatiewe gebied wat jongmense en opvoeders met praktiese omgewingsvaardighede toerus.

Een so ’n inisiatief is die Namib Desert Environmental Education Trust (NaDEET) se Omgewingsopvoederprogram, wat ’n toelaag van N$150 000 ontvang het om omgewingsbewustheid en -kennis regoor die land te bevorder.

NaDEET, wat in 2003 gestig is, bied ervaringsgerigte leer by sy sentrum in die NamibRand Natuurreservaat en sy Stedelike Volhoubaarheidsentrum in Swakopmund. Deur praktiese deelname leer deelnemers hoe om omgewingsuitdagings te verstaan en oplossings toe te pas in hul alledaagse lewe.

Die program sluit ’n vierdaagse inwonende opleidingsessie in waartydens opvoeders leer hoe om volhoubare gewoontes by jonger geslagte aan te moedig en self die voorbeeld te stel. Onderwerpe sluit hernubare energie, waterbesparing, afvalbestuur en aanpassing by klimaatsverandering in.

’n Belangrike deel van die opleiding is praktiese omgewingsouditering, waar deelnemers hul eie verbruik van water en energie, asook hul afvalproduksie, gedurende hul verblyf monitor.

Festus Awene, NaDEET se omgewingsopvoeder, sê dié oefening help deelnemers om meer bewus te raak van hul persoonlike verbruikspatrone.

“’n Unieke kenmerk van die program is die omgewingsouditkomponent, waar deelnemers hul gebruik van water, energie en afval dwarsdeur hul verblyf monitor. Hierdie praktiese oefening moedig besinning oor persoonlike verbruikspatrone aan,” sê hy.

Victor Maengahama, Nedbank Namibia se finansiële hoof, beklemtoon die langtermynwaarde van omgewingsopvoeding en die rol wat dit in gemeenskappe kan speel.

“By Nedbank Namibia glo ons dat volhoubaarheid uiteindelik oor mense gaan. Deur in omgewingsopvoeding deur die Go Green Fund te belê, help ons om ingeligte leiers en gemeenskapskampioene te ontwikkel wat blywende gedragsverandering kan bevorder.

“Programme soos NaDEET wys dat wanneer kennis met praktiese ervaring gekombineer word, mense bemagtig word om aktief by te dra tot ’n meer veerkragtige en volhoubare Namibië,” sê hy.