Jaggewere klap buite hoofstad

Skietsport
  • 10 Hours Ago
Die Namibië Jaggeweerskietvereniging (NHRSA) het vandeesmaand met trots 'n suksesvolle Sentraalstreek-skietbyeenkoms by die asemrowende Lichtenstein View buite Windhoek aangebied.

Die byeenkoms het skuts teen van die mees uitdagende terrein gestel wat in enige kompetisie vanjaar teëgekom is.

Op die strawwe baan was teikens op afstande vanaf 55 meter tot 328 meter geplaas, wat nie net presiese skietvernuf vereis het nie, maar ook stamina om deur die pragtige bergagtige landskap van die Khomas Hochland te stap. Die asemrowende uitsigte en die opwinding van die uitdaging het vir 'n onvergeetlike ervaring gesorg.

Die wind was deurgaans 'n beduidende faktor, veral die Vrydagmiddag tydens die .223-klas, wat deelnemers se skietkuns en aanpasbaarheid getoets het.

Gelukkig het die weer oor die naweek verbeter, wat skuts in staat gestel het om teen die Saterdagmiddag hul teikens met minimale inmenging van die wind en met maksimum akkuraatheid te vind.

Die sportmangees wat alle deelnemers aan die dag gelê het, het die gees van die NHRSA-gemeenskap geïllustreer, wat die geleentheid 'n ware viering van vaardigheid en veerkragtigheid gemaak het. Die vereniging bedank alle skuts wat deelgeneem het, asook die vrywilligers wat onvermoeid gewerk het om die bane te bou.

Van die voorste uitslae:

.223-rondte: 1 Stephanus Francois Marais jnr, 2 Marius Louw, 3 Luandre Benade.

Algehele wenners, eerste ronde: 1 Luandre Benade, 2 Stephanus Francois Marais jnr, 3 Marius Louw.

Algehele wenners, tweede ronde: 1 Stephanus Francois Marais jnr, 2 Luandre Benade, 3 Morné Louw.

Vrouewenners, eerste ronde: 1 Karola Marais, 2 Bets-Marie Coetzee, 3 Celeste vd Merwe

Vrouewenners, tweede ronde: 1 Bets-Marie Coetzee, 2 Karola Marais, 3 Celeste vd Merwe

Juniors (beide rondes): 1 Vincent Maresch, 2 Bea Marais.

Penkoppe: 1 Anja-Mari van der Merwe, 2 Ruan Marais.

Die NHRSA bedank Agra Safari Den wat onder meer van die toerusting op die skietbaan geborg het.

Die verenging herinner sy lede aan die algemene jaarvergadering op 8 November om 19:00 by Farm Zonnewaldt in die Stampriet-distrik. Die jaarlikse Sven Ahrens Memorial Cup (8 tot 10 November) is ook altyd ‘n merkwaardige byeenkoms, met die jaarafsluiting en prysoorhandiging op 9 November.